يا قلبى يا موجوع .. إياك تكون قلقان
لو طالت المسافات .. انا والأمل اخوات
وتالتنا كان الليل .. دة انا ليا فيها النيل
وليها فيا الروح .. ما اخترتش إنى اروح
ما انا جوعى كان كفران .. ملعون ابوك يا طموح
أخرك تشوفلى كفيل .. لكنى مش قلقان
تذكرتى رايح جاى .. انا مش فى بلدى عويل
لكـنى مش بتشاف .. زهرة سنينى عجــاف
مع إنى ليا عزيز .. إفتونى فى رؤياى
لَمـوا الأمانى إزاى .. حطوها على الباسبور
احلامى صبحت بور .. ممنوع عليها الضى
لكنى مش قلقان .. تذكرتى رايح جاى
البعد عنك خوف .. وأنا عالرجوع ملهوف
لكن هعود ازاى .. ومكانى كله ضيوف
يا قلبى يا موجوع .. يا آهه حاضنة دموع
حب البلد بيعيش .. لما يموت الجوع
يا حضن بيساعنى .. واحتجت له وباعنى
ساعة ما مد إيديه .. شاور وودعنى
لكـنى مش قلقـان .. تذكـرتى رايح جاى
0 comments:
Post a Comment